உயிர்மொழி

 சில அழகான பாதைகளைக் கண்டறிகிறோம், எங்கே போகிறோம் எனத் தெரியாமல் தொலையும்போது..! -செல்லா

வாருங்கள்! சிறிது  பாதை மாறிப்  போகலாம்! தார்ச்சாலைகளை விட்டுவிட்டு, சிலதூரம்  காடுகளுக்குள் செல்லலாம்! மண் பாதைகளையும், மலர் வாசங்களையும் கொஞ்சம் மனதோடு எடுத்து வரலாம்! நீண்ட நெடிய வனாந்தரத்திற்குள், சிறிது நடைபயணம் சென்று வரலாம்! மழை மேகங்களைத் தடுத்து நிறுத்தும் மலைகளுக்குக்  கவிதைகள் சில  பாடி வரலாம்! வெண்புகையாய் நம்மைச்சூழும் வெண்பனியை, விரலோடு கொஞ்சம் கொஞ்சி வரலாம்! தாய்ப்பாலாய்த் தாகம் தீர்க்கும் அருவிகளின் தாயன்பில்  நன்றாய் நனைந்து வரலாம்! ஓங்கி வளர்ந்த மரங்களின் தோப்பில் கொஞ்சம்  ஓய்வும் கொள்ளலாம்! தீராத நெடுவெளிகளில் காணாத உயிர்களைத் தேடித் திரியலாம்! மனிதன் தீண்டா தொலை தூரங்களைக் காலால் கொஞ்சம் அளந்து வரலாம்! விடியல் கொஞ்சம் விடைபெறும் வரை விளையாடிக் களிக்கலாம்! விளையாடிய களைப்பு தீர, மீண்டும் விடியும் வரை சிறிது விண்மீன்களின் அரவணைப்பில் உறக்கமும் கொள்ளலாம்! வாருங்கள். வாழ்வைக் கொஞ்சம் வாழலாம்..! -செல்லா

 

ஒரே ஒரு நாள் பிறந்தநாள் கொண்டாடுகிறாய். புலம்பியே சாகின்றன மீதமுள்ள 364 நாட்கள்..! -செல்லா

 இந்த உலகில் முன்னூறு கோடி பெண்களாம்..! நான் காதலிக்க நீ மட்டும் தான்..! -செல்லா

வெறும் காற்றில் விரல் அசைக்கிறாய். "கவிதை! கவிதை!" எனக் கூச்சலிடுகிறது காற்று..! -செல்லா

 கடிதத்திற்கும் காதல் முளைக்கிறது, உன் பெயரை அதில் எழுதும் போது..! -செல்லா

 ஊரெல்லாம் Leo வருகைக்காகக் காத்திருக்கிறார்கள். நானோ உன் வருகைக்காகக் காத்திருக்கிறேன்..! -செல்லா

 விழி பார்க்க வழி இல்லாததாலோ என்னவோ புரிய மறுக்கிறது உன் மௌன மொழிகள்..! -செல்லா

கந்தகம் பாய்ந்த தேசத்தில் பூச்செடி வளர்க்கச்சொல்கிறாய் மீண்டும் பொழியுமா, அந்த முதல் மழை..! -செல்லா

சில நிமிடங்கள் மௌனிக்கிறாய். சுற்றுவதை நிறுத்திவிடுகிறது என் உலகம்..! -செல்லா

 ஒரு மழைக்கால நாளில் உன் தோளில் சாய்ந்து வேடிக்கை பார்க்கும் நிமிடங்கள், அழித்துப் போகின்றன என் நிறைவேறா ஆசைகளை..! - செல்லா

 இரு துருவங்களில் தவிக்கும் நம்மை இணைக்குமா இந்தக் காதல்..! - செல்லா

 விடியலே நீ வேண்டாம் போ. கோபத்தில் இருக்கிறது என் வெண்ணிலவு..! - செல்லா

 சுருக்கென கோபம் கொண்டாய். மழையை விரட்டிவிட்டு வெயிலால் என்னை வதைக்கத் துவங்கியது வானம்..! - செல்லா

 என் ஜன்னல் வந்த காற்றே, அவனது உறக்கத்தைத் தீண்டாமல் சென்றுவிடு..! - செல்லா

 தனிமையில் தவிக்கிறது என் பெயர். இணைத்துக் கொள்ளவா உன் பெயருடன்? -செல்லா

 அம்மா வீட்டிலிருந்து நீ வரும் வரை உன் வாசத்தை சேமித்து வைக்கிறது நீ மறந்து விட்டுப்போன உன் சோப்பு..! - செல்லா

 உதிர்ந்து போன என் வாழ்வின் ஒவ்வொரு நம்பிக்கை இலைகளையும் மீண்டும் துளிர்விடச் செய்த மழைக்கால வானம் நீ..! - செல்லா

 பிரியும் இமை தானே காட்சி கொடுக்கிறது. விலகும் நிலை தானே காதல் சேர்க்கிறது..! - செல்லா

 வா. இன்னொரு முறை என் பைக்கில் ஏறி காதல் பிரயாணம் போகலாம்..! - செல்லா

 நீ இல்லா நேரங்களில் உன் நினைவுகளுடன் கைகோர்த்து நடக்கிறேன்..! - செல்லா

 எழுத்தில் வடிக்கப்படும் கவிதைகளுடன் எழுத்தில் வராத இதயமும் காத்திருக்கிறது உனக்காகவே..! - செல்லா

 அழுது தீர்க்க உன் தோளும், அயர்ந்து சாய உன் மடியும் இருந்தால் போதுமடி இந்த ஜென்மம் வாழ்ந்து முடிக்க..! - செல்லா

 ஆளற்ற அரங்காய் நிற்கிறது என் வீடு, உன் கொலுசின் சங்கீதத்திற்கு ஏங்கி..! - செல்லா